كتبت|هدى المنشاوي
كلام من العيار الثقيل على السوشيال ميديا
في السياسة انت ممكن تشتري طيارات، وتشتري دبابات، وحتى ممكن تأجر عساكر ييتكلموا أوردو أو تركي.. لكن العقل السياسي والثقل التاريخي؟ للأسف دول مش بيتباعوا في السوبرماركت!
إنك تدور على مصالحك، دا حقك ومحدش يقدر يقولك تلت التلاتة كام.. لكن حالة الكيد اللطيفة اللي بقت تحرك القرارات عندك دي فيها مشكلة ! تحس إن فيه استراتيجية جديدة اسمها: شوف مصر اقترحت إيه.. واعمل عكسه فوراً!
🟥 يعني مثلاً، مصر تقترح ناتو عربي للجميع؟ نطلع منه ونبوظه!
🟥 مصر عزماك على افتتاح متحف تاريخي أو قمة سلام؟ نعمل نفسنا مش فاضيين ونعتذر!
🟥 مصر عندها ملف السودان أمن قومي مباشر؟ نروح نعمل قعدة عرب في جدة، ونعزم فيها كل أطراف الصراع مع الجماعة إياهم، وننسى عزومة الجار المباشر اللي شايل الليلة كلها.
طبعاً كل دي مش تصرفات مراهقة سياسية خالص، ولا محاولة لارتداء توب أكبر من المقاس بثلاث نمر.. دي مجرد وجهات نظر!
بس وجهات النظر دي بتفكرنا بالطفل اللي أول ما يمسك مصاريف زيادة، يروح يشتري لعب بالهبل عشان يغيظ عيال الحارة، وفي الآخر اللعب تتكسر ويرجع يدور على اللي بيعرف يلعب بجد.
ولما تعمل حركة قطع النفط عشان تنشف ريق الجار، يكتشف إن الجار عادي جداً بيتصرف، بيروح يجيب من العراق ومن ليبيا ويقفل ملفه، والملف بيمشي والبلد بتمشي.
أصل الدول العريقة عندها ميزة صغيرة كده اسمها المرونة التاريخية.. بلد عاشت على طمي النيل آلاف السنين قبل ما النفط يطلع من الأرض، وهتفضل عايشة.
المشكلة إن بعض الناس فاكرة إن عصر الشيكات على بياض كان حب في السواد عيون حد، ومش فاهمين إن العلاقة بين الكبار مش علاقة كفيل ومكفول.
فيه فرق بين دولة بتشيل أمن المنطقة لأن ده قدرها وتاريخها، وبين ناس فاكرة إن القوة عبارة عن رقم في البنك. ولما ييجي الجد، ونشوف أول اختبار حقيقي في الميدان.. الدخان الكتير ده كله مش هيطلع منه سيخ كفتة واحد!
كلمة أخيره.. الكبير يفضل كبير!
مصر اتعلمت من تاريخها القريب والبعيد، وعرفت إن الدخول في خناقات المجاملات أو خوض معارك النفوذ بالوكالة دي لعبة مراهقين، ومصر معندهاش وقت ولا نقطة دم واحدة تضيع في سيرك مالهاش فيه ناقة ولا جمل.
اللي عاوز يجرب يحتمى بشرق أو بغرب، أو يمول جماعات، أو يعمل تحالفات ثلاثية ورباعية.. يتفضل الجو فاضي. بس يفتكر دايماً: الفلوس بتشتري سلاح، بس مش بتصنع رجال.. وبتبني أبراج، بس مش بتبني تاريخ. ومهما تنططت، هتفضل الحقيقة الواضحة زي الشمس: فيه فرق بين اللي بيعمل تاريخ، وبين اللي فاكر إنه يقدر يشتريه.
دول كلمتين ابرك من عشرة وافتكرهم بعدين
هدى المنشاوي
عضو الجمعية المصرية للاستثمار والتنمية في أسواق المال